ИШТИРОКИ АҲЛИ ДОНИШГОҲИ ДАВЛАТИИ ТИББИИ ХАТЛОН ДАР “ШАҲРАКИ НАВРӮЗӢ”

Санаи 12-уми март дар асоси нақшаи чорабиниҳои мақомоти иҷроияи ҳокимияти давлатии ноҳияи Данғара дар боғи фарҳангӣ-фароғатии «Хуррамшаҳр» чорабинии бошукӯҳи фарҳангӣ таҳти унвони «Шаҳраки Наврӯзӣ» бахшида ба ҷашни байналмилалии Наврӯз баргузор гардид. Ин иқдоми фарҳангӣ бо мақсади гиромидошти суннатҳои миллӣ, муаррифии арзишҳои фарҳангӣ ва таҳкими рӯҳияи худшиносии миллӣ ташкил карда шуда, дар он муассисаҳои гуногуни таълимии ҳудуди ноҳия фаъолона иштирок намуданд.
Дар маросими кушодашавии “Шаҳраки Наврӯзӣ” раиси ноҳияи Данғара муҳтарам Саломзода Сиҷоуддин иштирок намуда, аз намоишгоҳу дастовардҳои муассисаҳои иштирокчӣ дидан кард. Зимни боздид аз гӯшаҳои идона, роҳбари ноҳия ба ташаббус ва омодагии муассисаҳо баҳои баланд дода, таъкид намуд, ки чунин чорабиниҳо дар муаррифии фарҳанги миллӣ ва тарбияи ҳисси ифтихори ватандорӣ дар миёни ҷавонон нақши муҳим доранд.
   
Ҳайати омӯзгорону донишҷӯёни Донишгоҳи давлатии тиббии Хатлон низ дар ин чорабинӣ иштироки фаъолона дошта, меҳмонони олиқадрро бо қироати шеъру сурудҳои наврӯзӣ истиқбол гирифтанд. Дар гӯшаи намоишии донишгоҳ дастовардҳои илмиву таълимии ҳайати профессорону омӯзгорон, донишҷӯён ва кормандон муаррифӣ гардид. Аз ҷумла, китобҳо, дастурҳои таълимӣ ва монографияҳои омӯзгорони донишгоҳ, инчунин намунаҳои гуногуни ҳунарҳои мардумӣ, таомҳои миллӣ ва расму ойинҳои наврӯзӣ ба намоиш гузошта шуданд.
Дар намоишгоҳ инчунин дастархони идонаи "Ҳафтсину Ҳафтшин", ки рамзи фаровонӣ, баракат ва эҳёи табиат мебошад, бо зебогии хос ороста шуда, таваҷҷуҳи меҳмононро ба худ ҷалб намуд. Ғайр аз ин, намудҳои гуногуни хӯрокҳои миллии тоҷикӣ, ки бо маҳорати баланд омода гардида буданд, фазои идонаро боз ҳам рангинтар карданд.
Яке аз ҷиҳатҳои ҷолиби гӯшаи донишгоҳ либосҳои миллии зебо ва гуногунранг буд. Духтарони донишгоҳ бо либосҳои миллӣ, аз ҷумла атлас, адрас, чакан ва дигар либосҳои анъанавии минтақаи Тоҷикистон иштирок ва баромад намуда, зебоӣ ва рангорангии фарҳанги миллии тоҷиконро ба таври шоиста муаррифӣ карданд.
Ҳамзамон, дастаи ҳунарии «Дурахшон»-и донишгоҳ барномаи фарҳангии ҷолиберо пешниҳоди тамошобинон гардонд. Барнома аз суруду таронаҳои наврӯзӣ, рақсҳои ҷолиби минтақаҳои гуногуни Тоҷикистон иборат буда, бо сатҳи баланд иҷро гардид. Ҳунармандони ҷавон бо маҳорати касбӣ фазои идонаро гарму самимӣ намуда, ба чорабинӣ шукӯҳи хос бахшиданд.
Иштироки фаъолонаи аҳли донишгоҳи давлатии тиббии Хатлон дар “Шаҳраки Наврӯзӣ” бори дигар нишон дод, ки донишгоҳ на танҳо маркази илму дониш, балки макони тарғибу рушди фарҳанг, анъанаҳои миллӣ ва эҳёи арзишҳои таърихии халқи тоҷик низ мебошад. Чунин чорабиниҳо барои таҳкими дӯстӣ, ҳамдилӣ ва арҷгузорӣ ба мероси фарҳангии миллат саҳми арзанда мегузоранд.
Хабарнигори сомона

Please publish modules in offcanvas position.